［真人真事］悲劇，真係一單都嫌多！長文慎入 (有少少傷痛💔)

我外公，因為聽力受損，引發其他疾病，最後，連我媽都忘掉了。。。

２０２２年１月的某日早上，一早收到老媽子電話：［公公走左了。。。下刪幾十字］

媽子電話個把聲，係我成世人第一次聽到。

個種自責、傷心、內疚、痛心後加百九幾種自責既聲線，

真係哩世都唔想再聽多次！

由於哩把聲令我擔心佢會做傻事，所以就算未訓醒，都即刻飛奔去陪佢。

然而哩份絕望級既傷心內疚，相信媽子直到離開世界個日，都應該難以釋懷。

因為，當時封關加要隔離，我地連回鄉送公公最後一程既機會都冇！

享年九十六歲既外公本身係個大文人，係當地新聞事業既奠基者之一、＜漢語大詞典＞編纂人之一。

我對外公既印象係，每日除左照顧仔女外，其餘時間就係睇新聞、寫文章、睇書同報紙。

一位備受尊敬、學識淵博既頂級學者，腦根清醒、記憶力一向優秀！

然而，晚年（大約七十幾歲起）竟然因為對耳有事，深度重聽，而身邊既親人們又唔知點搞。

配過助聽器，但一句老人家唔岩戴、唔鐘意後，又不了了之。

長期無視下，導致佢出現認知障礙及一堆連鎖反應，最後連佢個二女（即係我媽)，都認唔到，唔記得。。。

相信世界上，應該冇咩比被自己親生父母忘記，更令人心碎！

點解一位老人家有聽障，就要由七十幾歲起，一路受苦到九十幾歲（如果長命百二歲點算)?！

一位老人有事，其實，只係全家所有人一齊受苦既開始！

內疚，另一個一世人既遺憾，當然都發生在我身上。

點解？點解我研究左對耳咁多年，就快有D野要搞出來時，只係差一年左右，但公公就等唔到。。。

悲劇，真係一單都嫌多！

公公走左，公公唔記得阿媽，係悲劇，

我問阿媽：［妳知唔知聽障人士比一般人患上認知障礙既機率高好多倍?］

阿媽話:［老人家記性差，係咁架啦。。。］

唉。。。比起人有病，我認為，身邊人覺得老人家病係正常，係自然現象，由得佢就算，先係真正悲劇既源頭。

換個角度，如果外公係一位後生仔，或者佢係各位身邊人時，大家又會點做？

因為不了解、唔認識，所以無視，任由問題發展，繼而醞釀另一個悲劇，係一場災難，係一個社會問題！

公公成世人都醉心學術，可以話佢係一個唔會用耳機去聽音樂既文化人，但聽損既悲劇照樣發生。

何況仲睇緊呢段文章既咁多位，身處香港哩個繁華鬧市，環境特別嘈吵，用耳機既用音樂、聲音對抗噪音，唔用耳機既就任由環境噪音傷害自己聽力健康！

想輕鬆係戶外聽下歌，但偏偏要同環境聲鬥大聲既咁多位～～～

按照世界衛生組織（World Health Organization）既警告，到2050年，預計全球將近25億人有某種程度的聽力損失，至少7億人需要聽力復健。

以香港計算，即係將有約185萬（即4個有1個）香港人有某種程度既聽力損失，至少81萬香港人需要聽力復健。

再加上不安全既用耳習慣，使超過120萬香港青年面臨永久性聽力喪失風險

唔知大家有冇發現，近呢10年越黎越多小朋友細細個就已經要帶眼鏡，但社會、家長反而唔覺得係一個問題？

要知道我讀書個年代，戴眼鏡係會比人笑"四眼仔"，講起要配眼鏡都好似對唔住列祖列宗。。。

我仲記得媽子細個時兇我：［你再成日打機搞到第時要戴眼鏡我就打死你！］

嗯。。。對眼有事，大家起碼知道，可以配眼鏡，可以去睇眼科醫生。

但係。。。耳仔呢，大家了解幾多野？

聽力受損真係咁簡單就解決到？耳鳴試過未？係嘈吵地方聽人講野特別辛苦？

覺得自己依家仲聽到野，有少少曚都唔緊要？

我地研究後發現，其實就連大家買耳機前周圍去試耳機既方法，都好易出事。。。

所以我相信，哩個發生係我身上既故事，大家未來幾乎都需要面對，

因為一個人有事，通常會影響成個家庭！

而哩位有事既人，唔一定係老人家，可以係家庭中既任何一位（包括新生嬰兒）！

唔同既係，未來我會盡餘生所能，去宣揚、去推動、去教育、去幫助，以及盡我能，改善以上問題！

我地會同大家一齊學習、研究、面對同解決，無論係現在、未來，希望係遇到同樣問題時，都能夠有足夠既知識同能力去應對，

從而，避免發生係我身上既悲劇、遺憾，重覆發生在他人身上！

最後，如果大家堅持睇到哩度，多謝你地！

真心希望大家仲有機會去愛護身邊人時，請盡量珍惜！

如果大家覺得我既親身經歷有用，歡迎分享比身邊人，好讓我地可以一齊正視聽力健康、聽力保健問題，係哩個問題上，我本人感同身受，所以我地都要共同努力，面對同解決！

This is not the end, but the beginning!

各位加油 by Tatco